Lippijn
|
Sotternie van Lippijn | |
| Auteur | |
| Genre(s) | Sotternie (klucht} |
| Brontaal | Middelnederlands |
| Datering | 14e eeuw |
| Bron | De Middelnederlandsche dramatische poezie Henri Ernst Moltzer, J. B. Wolters, 1875 |
| Auteursrecht | Publiek domein |
Het toneelspel Esmoreit werd soms gevolgd door de sotternie van Lippijn ingeleid door de volgende regels:
- Elc blive sittene in sinen vrede,
- Niemen en wille thuusweert gaen :
- Ende sotheit sal men u spelen gaen
- Die cort sal sijn, doe ic u weten.
- Wie honger heeft, hi mach gaen eten,
- Ende gaet alle dien graet neder.
- Genoeghet u, soe comt alle mergen weder.
Hier beghint die sotternie.
bewerken- Hier beghint dwijf.
- Hem! seght hem! god hebs al deel!
- Ic wil gaen driven min riveel
- Met minen suete lieve int gras.
- Hets lanc leden dat ic met hem niet en was.
- 5 Hem! segt hem! waer sidi, Lippijn?
- Lippijn.
- Ic ben hier, wat saelt sijn?
- Sijn wijf.
- Lippijn, ghi moet gaen ahlen borre ende vier,
- Ende ic sal wedercomen scier
- Ende bringhen ons iet dat wi selen eten.
- Lippijn
- 10 Bi der doot ons heren, ghi selet vergheten,
- Ghi pleeght soe dicwile lange te merren.
- Sijn wijf.
- Wat, Lippijn, ghi en mogher u niet erren,
- Want ic hebbe dicwile vele te doene:
- Eer ic ghehoere mine sermoene,
- 15 Soe vallet hoghe op den dach,
- Ende eer ic ten vlesschuus comen mach,
- Soe copic oec gherne goeden coep,
- Dan so moetic beiden tot den loop
- Es ghedaan vanden bedranghe:
- 20 Alsoe comet toe, dat ic merre soe langhe,
- Goede Lippijn, ghie moetet al weten.
- Lippijn.
- Awarijt, ghi souwes mi vele ontmeten,
- Ende ic en weter wat toe segghen.
- Gaet henen, ic sal ons vier anleggen
- 25 Ende halen borre ende scueren den pot,
- Want alsoe moet mi hulpen god,
- Ic hebbe mi oeit te slavenien geset.
- Sijn wijf.
- Goede Lippijn, wast die scotelen met
- Ende kerijt ons den vloer scoene.
- Lippijn.
- 30 Goede, nu hoert, dat u god loene!
- Ende mer daer bi niet. Al hebbic al mijn dage
- Gheweest uwe aerme slave,
- Mi dunckt ic moetse noch sijn al mijn leven.
- Sijn wijf.
- Swijt, god moet u lachter geven,
- 35 Dat ghi soe langhe leeft, dats mi leet.
- En es dit niet een scoen bescheet?
- Waer mach mi merren, mijns herten druut?
- Het gheet hem al te galgen uut,
- Dat hi mi al dus te vondelinge set.
- Haer lief.
- 40 Minnekijn, hets messelijc wat mi let:
- Hebdi daer gheweest herde lange?
- Lippijns wijf.
- Jaic, mijn herte es soe wranghe,
- Dat ic us soe langen niet en sach.
- Haer lief.
- Laat ons gaen drinken een goet gelach,
- 45 Mijn uutvercoren minnekijn,
- Wi selen moch tavont met vrouden sijn
- Lichteleec. Nu comt hier naer!
- ----
- Lippijn
- O wi, here, es dat waer?
- Bi gode, ic hebs ghenoegh gesien,
- 50 Want si leet metten bloeten knien
- Ende hi esser tusschen gecropen;
- Bi der doot ons heren, hi esser in geslopen,
- Siet, met deser doeren, ende gheeft mi te verstane
- Dat si te messen pleght te gane,
- 55 Ende leer ende droeylt met enen anderen man
- Ende maect van mi enen pol her Jan.
- Si seet, si gheet int vleeschuus:
- Bi sente Jan, ic sal haer dit abuus
- Noch tavont tengoede maken.
- 60 Canic an enen stoc gheraken,
- Ic sal haer touwen soe haer vel,
- Dat haer rouwen sal dit spel,
- Dat si met hem heeft bedreven.
- De comere
- Wat Lippijn! god moet us goeden dach geven.
- 65 Hoe steet met u? hoe sidi te ghemake?
- Lippijn.
- Ey, Trise! ic woude mi therte brake
- Van groten rouwe die ic drive.
- Ic en hadt nemmermeer minen wive
- Betrout, dat si mi heeft ghedaen.
- De comere.
- 70 Lippijn, nu doet mi verstaen,
- Hoe ende oec in wat manieren?
- Lippijn.
- Dies ic mi eweleec moet scofieren:
- Si leget ende droeylt met enen anderen man.
- De comere.
- Awarijt, dats een dinc dat ic niet en can
- 75 Gheloeven van uwen wive:
- Ic kinse alsoe reine van live,
- Si en daets om al die werelt niet.
- Lippijn.
- Dat een man met sinen ogen siet
- Dats hem nochtan quaet tongheven.
- De comere.
- 80 Lippijn, alsoe met eren leven,
- Bi sien es die meneghe bedroghen.
- Lippijn.
- Wat, neen, dit en es niet gheloghen,
- Want ic hebse selve ghesien
- Ligghen metten bloeten knien
- 85 Ende gingen hem beide te werke stellen.
- De comere.
- Wat, Lippijn, dat en soudi niet vertellen,
- U wijf waer daer bi gheonneert:
- U ogen sijn al verkeert
- Van drincken ende van ouden dagen.
- 90 Goede Lippijn, en wilt des niet ghewagen:
- U wijf waer daer bi gescent.
- Lippijn.
- Wat duvel, seldi mi maken blent
- Van dingen die ic selve sach?
- Ic sach dat si averecht lach
- 95 Ende hi raepter op haar slippen.
- De comere.
- Ey swijt, goede Lippijn,
- En was anders niet dan u dochte.
- En hoerde ghi noit seggen van alfsgedrochte
- Dat die liede pleghet te bedrieghen?
- 100 De viant geeft luttel om een lieghen
- Om toren te maken tusschen man ende wijf.
- Ic wilder over setten mijn lijf.
- (En waest niet) een elvinne dat ghi saecht.
- Lippijn.
- Wat duvel, heeft god die werelt gheplaecht
- 105 Met alven ende met elvinnen?
- En soudic dan mijn wijf niet kinnen?
- Dat ware emmer een messeleec dinc.
- Ic sach dat si met hem ginc,
- Hi namse in sinen aerm ende tracse naer.
- De comere.
- 110 Lippijn, loghen en was noit waer:
- Daer toe kinnic te wel u wijf,
- Want si heeft alsoe reine lijf,
- Si en daets om al de werelt niet van goude roet.
- Maer dalfsghedrochte es alsoe groet,
- 115 Dat den menegen maect soe blint,
- Dat hi hemselven niet en kint,
- Hoe soude hi dan enen andren ghekinnen?
- Lippijn
- Bi der doot ons heren, ghi maect mi al uuten zinnen.
- Wat duvel, es mi nu gesciet?
- 120 Benic blint ende sie ic niet?
- Des wonders ghelijc en sagic nie,
- Ende ic sie wel alle dese lie
- Die hier sitten al omtrent:
- Entrouwen, sie en benic al niet blint,
- 125 Al soudijs mi gherne maken vroet.
- De comere.
- Lippijn, wetti wat ghi doet?
- Ic biddu dat ghijs nemmermeer en segt
- Ende ghi u wijf mete eren dect.
- Het es ene elvinne die u quelt,
- 130 Si heeft u ghesichte al ontstelt,
- U ogen staen al ontset.
- Lippijn.
- Ey goede, eest dat, dat mi let?
- Mi dochte emmer dat icse sach.
- De comere.
- Het was ene elvinne dat daer lach:
- 135 Dat willic u sweren op een cruus.
- U wijf sit noch in daer huus:
- Dat willic wedden om een bier.
- Lippijn.
- Ende si hiet mi gaen halen borre ende vier,
- Si seide si soude daen om eten.
- De comere.
- 140 Wat, Lippijn, wildi die waerheit weten,
- Soe sidi seker te male verleidt:
- Ene elvinne heeft haar nette gespreidt,
- Dat sie ic wel, om u te vaen.
- Comt met mi, wi selen voer u dore gaen:
- 145 U wijf sit noch bi haren viere.
- Lippijn.
- Wat! benic droncken van den biere,
- Ochte vlieghen dalve achter straten?
- ----
- De comere
- Wat, ghevadere en mochdi ons niet in laten?
- Lippijns wijf.
- Wet key, jaic, wie es daer?
- De comere.
- 150 Wat, Lippijn, en seidic u niet waer?
- Lippijn.
- Benedijste god van hemelrijc,
- Soe en saghic noit des wonders ghelijc.
- Ic sie wel, die scouwen die sijn mijn.
- De comere.
- Wat seidic u, lieve Lippijn?
- 155 Maer ghi en woudes niet wesen vroet.
- Mijn gevadere es ghetrouwe ende goet,
- Al soudier gerne een hoere af maken.
- Lippijns wijf.
- God gheve hem ramp in sine kaken!
- Heeft hi hem van mi dies beclaecht?
- De comere.
- 160 Jay, ende dat ghi bi enen anderen man laecht:
- Dies heeft hi mi ghedaen een beclach.
- Lippijn.
- Awarijt, mi dochte dat ict sach,
- Maer ic laets mi nu ghenoeghen:
- Trise caent wel in beste voegen.
- 165 Maer al hadt mi mijn lijf ghedaen.
- Soe waerdi heden morgen op ghestaen
- Ende hiet mi halen vier ende borre.
- Lippijns wijf.
- Swijt, wel vule corre,
- Beghindi mi anderen man ane te tien?
- Lippijn.
- 170 Seker, woudic die waerheit lien,
- So saghic, of mijn ogen waren mi verkeert.
- Maer Trise heeft mi alsoe geleert
- Ende seet, dat mi een alf heeft bedroghen.
- Lippijns wijf.
- Waer omme hebdi mi dan geloghen
- 175 Ende doet mi scande over al?
- Lippijn.
- Ey minnekijn. ic ben diet beteren sal,
- Hebbic iet messeit ofte mesdaen.
- Lippijns wijf.
- Ghi selter nochtan smeten omme ontfaen,
- Vul, out, quaet grijsaert!
- De comere.
- 180 Bi onsen here, hi waers wel waert,
- Dat wine onder voete gingen leggen.
- Lippijn.
- Lieve wijf, in en saels nemmeer seggen:
- Ic en wiste niet, dat ic was in dolen.
- Lippijns wijf.
- Ei, men sal u leren gaen ter scolen.
- Hier vechtensi.
- 185 Ghi goede liede, dit hebben wi
- Ghespelt al in een boerdement.
- Si leven noch wel, si u bekent,
- Die dese gheliken wel hebben gesien.
- Wet dat menech boerden ghescien,
- 190 Daer dusdaneghe mere niet af en gaet.
- Daer bi biddic u dat ghi ontfaet
- In dancke ons fobitasie.
- Ic bidde den coninc vol van gratie,
- Die vander maghet was gheboren,
- 195 Dat hem niement en wille storen
- Van dat hi hier heeft gesien ende gehoert.
- Staet op, ghi moget wel gaen voert,
- Want wi moeten alle scheiden:
- Ons here god moet ons allen geleiden.
- Amen