voort tusschen beyden Polen zodiaci et aequatoris alwaar sy in corte tydt conde ommecomen om die teeckenen van de Zodiac, overmits alle die teeckens bij de Polen dichtaen malkanderen lopen. Sommighe Historieschrijvers dit niet verstaenden hebben met verwonderinghe geschreven dat dese Comeet soo snel was, datse op een dach reysde anderhalf teecken, jae ook opt leste twee ofte drie teecken daeghs. 't Welck conde gheschien alwaert schoon dat die Comeet niet meer als acht ofte thien graden daeghs reysde. Daeromme connen geleerde luyden grote misslach doen. Wanneer sy willen beschryven 't ghene sy niet recht verstaen. In dese tyden woelde die Hertoch van Borgondie carolus die stoute; ende Groningen creegh nieuwe wallen, ende schone poorten, die men nu verandert ende verset.
Wij conden veel meer Cometen uyt oude Historiën voortbrenghen, soo het noodich ware. Dan ons dunckt best te syn tot die laest hondert jaren te comen.
Sedert het jaer 1500 tot nu toe synder by de twintich Cometen ghesien, te weten, in den jaeren 1500, 1506, 1527, 1530, 1531, 1532, 1533, 1538, 1539, 1556, 1558, 1569, 1577, 1585, 1590, 1607 end dit jaer twee. T' is wonder datter vier Comeetjaren an een syn geweest. Ende dat die keyser carolus is tot Gent op een Comeet jaer geboren anno 1500 ende in Spagnien op een Comeet jaer ghestorven anno 1558. Hy is oock een bysonder man gheweest. Desghelycks syn sone philippus is mede op een Comeet jaer geboren 1527, ende Romen dat selve jaer van 's keysers volc ingenomen ende geplundert. In de vier Comeet jaren worde ghebroet 't spel tot Munster, daer een Schroor van Leyden ende een houtsagher van Haerlem meesters van waren. De Turk solymannus woelde in Hungarien etc. Anno 1556 ende 1557 was een swaren duyren tydt in 't Nederlant, so dat men niet veel dierghelycks van te voren gehoort hadde.
Anno 1570 was het Alderheylich hoogh water in Hollandt ende Frieslant, daer veel menschen goedt ende bloet quyt worden. Ende corts daer na begon die bloedige crygh in Hollant ende Zeelant. Maer na de groote Comeet anno 1577, die men savondts sach in de
