Courante uyt Italien, Duytſlandt, &c.
VVt Roomen den 2. Ianuarij, 1621.
VAn Napels heeftmen, dat de Cardinael Zappata een Billiet int Palleys heeft aen slaen laten, dat uytghenomen die ghetituleerde niemant sonder oorlof te hebben, in die Camer van State gaen soude. Den Capiteyn Major heeft op ontfangen Conincklijck bevel alle Geestelijcke incomsten, op te teecken, ende naer dat Spaensche Hof aviseren moeten, tot welcken eynde, weetmen noch niet.
Van Mantua wert gheschreven, dat de selve Hertogh alle Leen-luyden in Monferat heeft bevolen, op alle noodt-valle in bereytschappe te staen, om deselve Landen, naer inhoudt haere plicht, te defenderen.
De Cardinaei Borgia heeft met eenen expressen Courier zijn vertreck van Napels naer het Spaensche Hof gheadviseert.
VVt Venetien, den 8. Iannuarij, 1621.
Wy vernemen dat van onse Armade, die sich tot Curzala bevint, 3. groote Galleyen, naer Levanten ghesonden zyn, om 3000. Soldaten ende veel Schip-volck voor dese Seigneurie over te brenghen. Ende souden 20 Galleyen in Candien ende 10 in Dalmatien toegherust werden.
Die Brieven van Mylanen brenghen mede, dat de Grave Alfonso d’Altemps bevel heeft om 6000. Duytschen aen te nemen, ende was de Overste Ro, van syn arrest, weder ontslaeghen. Oock was bevolen dat uyt het Arsenael tot Pavia 60. Stucken Gheschuts souden ghetrocken werden. Des Hertoghen van Mantua Ambassadeur heeft van den Gouverneur tot Mylanen naer Monferrat veel Ruyters ende voetvolck begheert, maer is hem ront afgheslaghen, om dat die aen de Frontier-plaetsen, gheen oorsaecke ghegeven werde, hun oock te Armeren.
Van Genua heeftmen, dat de Prince Philebert van Savoyen, aen den Hertoch van Doria gheschreven heeft, om 10. Galleyen veerdich te houden, daermede hy die ghebruycken coste, de ghenoemde Prince was tot Alfax, verwacht aldaer bequaem weder, om tot syne Reyse naer Italien.
Wt Constantinopel, wert den vreede, tusschen den grooten Turck ende den Coninc van Persen, oock die Crijchs-rustinghen teghen den Coninck van Polen, gheconfirmeert. Die grooten Turck heeft die Bassen van Belgrado, Buda, Strigonia, ende Bossina bevolen, dat sy den Betlem Gabor, met alle macht te hulpe souden toe trecken. Ondertusschen wierde met die Zee-Armade sterc voortgevaren, om tegen het voor-jaer, uyt te lopen.
VVt VVeenen, den 9. dito.
Die Moravische Gesanten, syn alhier noch niet comen, ende continueert noch dat geheel Moravien sich aen hare Key. Maj. begeven heeft. De Grave van Bucquoy, treckt met den gantschen Legher, in 20 duysent starck, naer den Weissenberg toe, van daer hy zynen wech naer Thurna soude nemen, ende den Oostenrijcksche Bodem niet en soude betreden, dewyle die Oostenrijcsche Standen daeromme by hare Keys. Maj. aengehouden hebben. Ende is desen Lant-dach noch niet ten eynde ghebracht.
Men verhoopt gantschlijck met die Hungeren ende Bethlem Gabor oock ten eynde te comen, want morghen alhier de zyne by des Franschen Ambassadeurs Ghesanten, weder af-waerts, ende toecomende weecke sullen die Keyserlycke Commissarien tot den aenghestelden Vredens tractatie nae die Nieustadt verreysen, maer men besorgt, indien men met die Hungeren ende Betlem Gabor te scharp procedeert, dat zy die Turcken ende Tartaren te hulpe roepen mochten, want tot Ofen, Crom, Erla, Canisa, ende andere Turcksche Frontier-huysen veel duysent Turcken te samen comen.
Van Presburg comt tydinghe, dat die Hungeren ende Turcken seer starck te samen trecken, desghelycx die oude Grave van Thurn, dewelcke nu Betlem Gabors Overste Luytenant is, de Grave van Bucquoy by den Weissenbergh gheslaghen, ende veel volcx soude ghebleven zijn, het vervolgh, leert den tydt.
VVt Prage, den 10. dito.
De Overste van Walsteen, heeft uyt Moravien 1300. Vaten met Wynen alhier brenghen, ende in diveersche plaetsen in die oude Stadt legghen laten, om die te vercoopen.
Op die cleyne zyde deser Stadt, werden op die Marckt die Winckels afghebroken, om die plaetse grooter te maecken, tot wat eynde, weet men noch niet.
Van Breslaw wert gheschreven, dat de Coninck van daer naer Berlin verreyst is, hadde te voren die Boheemsche Officiers ende Raden, die met zyne Majest. ghevlucht waren, tot sich ontboden, ende hun bedanckt, datse hem gheconvoyeert hebben, indien zy oock begeeren voorder met hem te reysen, ware wel te vreden, wilde hun kost-vry houden, sijn alsoo mede voort ghevaren, want sy zeyden, indien zy in Bohemen quamen souden hun die Hoofden voor de voeten ghelegt werden. Men segt voor seecker, dat die Coninck om de hulpe te bevoorderen vertrocken is, gelijck dan inde Kercken daer vore ghebeden wert, dat hem Godt op dese haestighe reyse begheleyden wilde. Daeghs voor hare Maj. vertreck, heeft zy by den samentlijcken Heeren, Vorsten, ende Standen een ure lanck eene Oratie gedaen, van hun afscheyt ghenomen, ende tot stantvasticheyt vermaent.
Ondertusschen waren Couriers tot Breslaw van Betlem Gabor aencomen, ende deselve Standen nochmaels hooch vermaent, dat sy by den Coninck houden souden, want hy Betlem alreede met 18. duysent Mannen tot Hungerisch-brodt aengecomen was, ende noch veel 1000. int marcheren waren, om syn uyterste te versoecken.
Wt Moravien heeftmen, dat dieselve Standen tot Brin te samen synde, een Gesanten naer die Grave van Bucquoy ghesonden hadden, dat sy met hem accorderen wilden, t’welck een fynen handel is, daer sy te voren eenen grooten lof ghehadt, maer nu soo haest meyneedich werden.
De Grave van Bucquoy heeft voor Messerits 4. Stormen verloren ende weder daervan aftrecken moeten. Interim was tot Breslaw wederom eenen Coutier van Betlem aencomen, dewelcke terstont den Coninc naer getrocken is, men segt, dat hy weder te rugghe comen soude, in somma daer gaen veele reden omme, ende mochte tegen het voor-jaer noch vreemt af-loopen. Ende als nu Betlem vernemen sal, dat die Moraviers soo meyneedich werden, sal hy met die hulpe niet versuymen. Den Lant-dach tot Breslaw, was gheeyndieht, het besluyt van dien sal men metter tijdt vernemen.
