Courante uyt Italien, Duytſlandt, &c.
VVt Roomen, den 3. April. 1621.
VVT Napels wert gheschreven, dat aldaer van Trany in Apulien ghebracht waren eenighe Turcksche Verspieders, daeromme die van Napels vreesende dat die Turcksche Armada op Apulia mochte aenghesien zyn, veel volcks te Peerde ende te voet derrewaerdts ghesonden hadden, ghelijck oock gheschieden soude naer Calabria ende Abruzo.
Wy hebben uyt Spanjen advijs, dat die Spanjaerts in West-Indien eene nieuwe Silvere Myne hadden ghevonden, waer uyt men Jaerlijcks wel 7. Millioen suyver soude trecken.
VVt Venetien, den 9. April. 1621.
Van Livorno schrijftmen, dat aldaer aencomen waren 4. Schepen van Thunis ende Algier, met seer veele Coopmanschappen, die vande Zee-roovers ghenomen waren.
Wt Constantinopel wert gheadviseert, de doot vanden eersten Visir, ende was in die selve plaetse ghekoren Ali Bassa Generael van der Zee, zynde een groot vrient van die Christenen, waer dore men vermoedt, dat het voornemen vanden Turck teghen die Christenen wel mochte veranderen. Niettemin ginghen die Crijghs-ghereetschappen teghen de Polen noch dapper voort.
De Brieven van Mylanen brenghen mede, dat deselve Gouverneur van daer naer Roomen was vertrocken, met grooten onwille van de Spanjaerts. Ende wert van Mylanen gheconfirmeert de nederlage van de Liga Grisa, hun aenghedaen van de Engadiens, zynde onder andere ghebleven een van de Ghesanten, die ’t accoort tot Mylanen ghemaeckt hadden. Oock datter veel nieu Crijghsvolck tot Mylanen gesonden wiert, om de nieuwe Forten in Veltolin te verstercken, ende die Engadiners te resisteren.
Ondertusschen verstercken hun oock die Engadiners, hebben op’t nieu met 1500. Mannen eenen inval ghedaen, int Lant van Tosan, aldaer tegen hunne vyanden ghescharmutseert, ende in die 80. Soldaten doot gheslaghen: Soo dattet aldaer in die quartieren dapper begint.
Van Thurin wert gheschreven, dat de Hertoge van Savoyen veel Crijghsvolck lichten dede, soo Francoysen als andere, waer over die vande Steden Geneven ende Bern seer jalours, ende op hare hoede waren.
Interim hadde de Ertz-Hertoghe Leopold aen zyn Crijghsvolck (die op de Frontieren van Switserlant laghen) gheboden datse hun ghereet souden houden, om voort te marcheren.
VVt VVeenen, den 10. April.
Die Keyserlijcke Heeren Commissarissen bevinden sich noch tot Heimburgh, ende soude voor seecker met den Betlem Gabor ende die Vngeren vrede werden, maer by aldien dat zy sich met accommoderen wilden, heeftmen alreede een anders teghens hun voor te nemen bedacht, ghelijck dan aen dry plaetsen hare Keys. Maj. Crijghsvolck te samen treckt, om hun aen dry plaetsen aen te grypen.
Die examinatie van de Borgers deser Stadt, heeft nu een eynde, men verstaet, dat alle die Borgers dewelcke hun tot den ghewelt begeven ende onder schreven hebben, oock aenhouden sullen. Die Luytersche Evangelische Standen comen inde 70. starck alleen int Lanthuys tesaemen, om hare saecken, maer insonderheyt van wegen die Landen op der Ens te beraetslaghen, insghelijckx comen die Catholijcken oock alleen starck te samen.
Naerdien men met die Stadt Pilsen geaccordeert heeft, is Monsieur Tilli alreede voor Ellenbogen ghetrocken, soo verhopt men, dat niet alleen deselve Stadt, maer oock Tabor ende Wittengauw sich oock al over sullen geven moeten, ende alsoo dat Mansveltsche volck alle tesamen uyt Bohemen ghebracht ofte in Keyserlycke bestellinge genomen werden.
Wt Moravien schrijftmen, dat aldaer oock eenige Heeren ende Lant Staten in gevangenisse syn gestelt worden, oock die Steden Olmits, Znaimb, Brin ende Iglauw ontwapent worden.
Van Lints heeftmen, dat de Heere Carel vry Heer van Insbruck, met noch eenen anderen, elck in een besonder Schip van daer naer Passauw syn gebracht, ende op dat opper huys aldaer gevangen gheleyt worden, die andere gearresteerde ende gevangene Heeren, laghen noch int Casteel tot Lints, die waeren weder opt nieuw gheexamineert worden, het welck alles noch secreet was.
VVt Praghe, den 9 dito.
Met Flackenauw, Ellenbogen ende Palsche staet het noch int oude wesen, dese daghen heeft die Flackenauwer met eenige Peerden ende voetvolck inde 20. Wagens met Hoy Haver ende Stroy daer binnen meynen te bergen, daer op van onse Ruyters aengegrepen, alsoo dat sy met die Peerden de vlucht moesten nemen, ende die Waghens staen laten, maer alsoo hun dat volck hebben tot weer gestelt ende een van onse Luytenants doorschoten, hebben die onse dies te starcker, op hun ghesedt, by de 60. doot gheslagen, ende wederom int quartier getrocken.
Dese daghen syn die ontweeckene Directeurs ende andere, alhier tot de leste reyse, door 2 Herauden met twee Trompetters ende Ketel Trommelen ernstelijc geciteert. Daer na op alle plaetsen der dry Prager Steden, door twee Heraulten, dewelcke die dry Keyserlijcke Rechters ende 100. Musquettiers gheconvoyeert, dat oordeel teghen ghenoemde persoonen ghepubliceert, deselve in de Acht verclaert, ende werden daghelijcks noch veel meer Borgers ende Ridders personen gevangen.
Door dry daghen syn 7. Vaendelen voetvolck ende eenighe Ruyters hier door ghetrocken, men seght naer den Over-Palts toe.
De Marcgrave van Jagerendorp soude dese daghen sich der stadt Glats bemachticht hebben, ettelijcke in de selve Graefschap, Ridders ende Borgers, welcke afgeveerdicht waren om herrewaerts te komen, gevangen, ende die Stadt door
