4
Eenighe Borghers en Vrouwen die den Commandeur met zijn Soldaten ontmoeteden, werde groote overlast ghedaen met slaen ende plunderen, ende oneerlijck aentasten: Eenen grooten hoop Borghers voor uyt treckende met haren Predicant, na VVaddinx Veen, hoorden aldaer noch de predicatie onverstoort.
Den 27. April trocker weder eenen grooten troup Borgers uyt de stadt met een Predicant: De Predicatie ten halven zijnde, werden zy vande Soldaten bespronghen, ende schandelijcken gheplundert, soo datter vele hare Mantels, Hoeden, Huycken, Schortendoecken, Rocken, en anders zijn benomen, eenighe Vrouwen zijn seer schoffierlijcken aenghetast, en mishandelt: Een man komende van Hastert, ende siende datter een vrouwe tot op haer hemde toe uytgheschut wiert, wilde daer voor spreken, doch zijn de Soldaten hem op’t lijf ghevallen ende wiert den arm by naest af ghehouwen. Ende eenighe zijnder int water gheworpen, ende met Rappiers onder t’water ghehouden om datse versmoren souden: De Borgers weder wat tot haer selven komende, hebben de Soldaten den meesten buet ontjaeght ende ontweldicht. Door dese Daedt zijn de Borghers seer verbittert ende en willent daer by niet laten. Eenighe goede Borghers opt Stadthuys haer klachte doende, kregen van de Heeren tot antwoort, datse vande Soldaten vermeestert waren, ende dat het van hoogher handt quam.
Men seyt datter wel inde seventich ghebannen Predicanten int Landt wederghekeert zijn, die over al inde Steden ende Dorpen openbaer en heymelijck predicken: Doch worden deselve seer vervolght, om in handen ghekreghen, ende op ghesloten te worden.
Over een wijl hebben zy een Predicant gevangen in’t Lant van Goeree, die ghevanghen blijft sitten op de Ghevanghen poort in s’Gravenhaghe, ende ghehouden wordt, soomen meent, tot een eeuwighe ghevanckenisse, sonder dat wijf oft kinderen by hem moghen komen.
