5
Sekere twee ghebannen Predicanten, den eenen zijnde een gheboren Borgher van Wesel, ende den anderen van by Wesel, ende ghewesen Predicant tot Huesens zijn beyde ghereyst na Wesel om haer eyghen particuliere affairen te berichten, alwaer de Predicanten van Wesel op de Predick-stoelen en elders teghen haer dapper ghedondert, en gheblixemt hebben: Daer naer is een vande voorsz. ghebannen Predicanten van Wesel naer Emmerick verreyst om zijn particuliere saecken: al waer hy komende by sekeren Licentiaet inde Rechten, ende met hem in dispuyte quam over eenighe geschillen, heeft dese Licentiaet, vande Weselsch Predicanten opgemaeckt zijnde, hem gaen beklaghen by den Gouverneur, die den voorsz. ghebannen Predicant tot Emmerick heeft ghevanghen, ende tot Cleef ghebracht, al waer hy hem in een herberghe 8. oft 10. daghen met Soldaten heeft doen bewaren tot dat den Bode, diense naer s’Gravenhaghe hadden ghesonden, wederkeerde: ende hebben doen den voorsz. Predicant ghevoert nae s’Graven-Haghe daer hy ghevanghen wort ghehouden.
Dit wort by velen seer qualijcken ghenomen, segghende dat de Staten Generael aldaer hebben gevioleert het Privilegium de non evocando, Ende dat in een Hertochdom welck onder het Rijck is: Ja dat meer is, seghtmen hier door gevioleert te zijn, seker recht welck int Landt van Cleef, ende by namen oock te Emmerick soo strengh wort onderhouden, dat selfs gheen Dieven, Schelmen, Moordenaers, oft Lantverraders en moghen opghesloten werden, oft moeten eerst op alle de hoecken van de Marckt ghebracht worden, al-waermen eerst afvraeght of yemandt voor hem met lijf en goedt wilt borge blijven: Soo yemandt borghe blijft wort vande hechtenisse ontslaegen. Wat dit te beduyden heeft sal den tijt leeren.
Op den derden Mey, seker ghebannen Predicant, een vande 14. die int Synode tot Dordrecht is gheweest, reysende te voet van Leyden na Amsterdam, ontmoet hem, op een waghen by Cuydelstaert, eenen Soon vanden Borghemeester Pauw tot Amsterdam, ende Bruninx Secretaris van Enchuysen, ende
