7
Bode van Dordrecht die op den Haegh reysde: desen Bode soeckt hy mede te beweghen om den voorsz. Predicant naer te rijden, ende te doen apprehenderen om die 500. gulden te winnen: maer den Bode weygert sulckx: Hy dreyght hem met het verlies van zijn Boo-schap; doch hem niet veerder konnende krijghen belast hem, soo hy in s’Gravenhaeg soude komen, te gaen bijden Schout Muys van Dordrecht, die nu sit inde Staten Generael om hem sulcx te segghen. Oft nu desen Verburgh wel hadde ghesien dat het een Predikant was, weten wy niet, doch daer en is niemant in handen gekomen. Niettemin sietmen wel, na dien selfs Heeren ende groote Meesters so vierich haer stellen tegen de Arminiaensche Predicanten, datse dapper benepen zijn, nv wel gewaer worden in wat uytersten noot zy t’Lant door haer strengheyt ghebracht hebben.
De Gommariste Predicanten zijn hier heel weyts en trots in haer harnas, soo dat niemandt haer schier mach aenspreken oft t’moeten al lieve Susters oft Broeders wesen, en by namen niet des Sondaechs, wanneerse haer beste kleederen aen hebben. In Noort-Hollandt is een Dorp Mid-wout ghenaemnt daer willen de Boeren gheene Gommariste Predicanten beroepen, noch te Kercke comen; soo dat de Predicanten vande omligghende Dorpen daer noch somwijlen comen predicken. Soo ist lest gebeurt dat de Predicanten van Benningh-broeck daer ghepredickt hebbende, hem twee Huyslieden inde Kercke aenspraecken om hem wat te vraghen het ghene zy in zijn Predicatie hadden ghehoort. Sijn antwoordt was, gaet door, ick wil met v niet te doen hebben: den eenen hem een weynich aen zijn besten mantel raeckende, is hy gheghaen na den Officier, ende heeft die twee Huyslieden soo hooghe beklaeght, dat den Officier hem heeft in rechte betrocken, ende op hun eenen eysch ghedaen van acht honderdt ghulden, oft te Landt uyt: Dese Boeren hoe welse met certificatie van vijfthien gheloofweerdighe ghetuyghen konden bewijsen, datse niet onbehoorlijcks hadden ghedaen, haddent quaet genoech, en soudent ergher ghehadt hebben, ten waere dese fijnen Predicant van Benningerbroeck ontrent die tijdt wat erger begaen hadde: want alsoo eenen Arminiaen (men seyt dat het
