8
een Predicant is geweest) van Medenblick met een Timmerman quam gaen naer Hoorn: quamen zy in gheschil over de Dortsche Synode en heure Canons, dies den Timmerman den Arminiaen by den Predicant van Benningh-broeck, (daerse by waren) wilde hebben, ghelijck zy oock gingen. Doch hadden zy niet langhe by den Predicant gheweest, oft hy begon den Arminiaen dapper met vuysten te onderwijsen (eenighe meenen dat hy droncken was, want hy een goet Pullebroer is) zijn Wijf die te voren een Weerdinne hadde gheweest, begon mede den Arminiaen opt lijf te touwen, hy van voren, ende t’wijf van achtere, ende stooteden hem teghen de Wanden, Kassen en Kisten: Den Timmerman riep dat soo te preecken gheen recht Predicanten voer was, doch hy moest flux ten huyse wt: Den Arminiaen is een wijl daer naer ghevolght, diense beyde als een verloren Soon, ten huyse wt gebost hebben. Den Timmerman heeft, daer toe versocht zijnde, hier Attestatie van ghegheven, waer uyt blijckende was dat den Predicant selfs schandelijck dede t’ghene hy andere te laste leyde: Doch dit al heeft soo veel noch moghen helpen dat zy slechts zijn ghecondemneert inde boete, den eenen van 6. pont den anderen van 8. pont, om datse quansuys tumult ghesocht hadden aen te rechten. Sulcke kluchten gheschieden hier over al soo veel datmender wel een heel boeck van schrijven soude: Doch al par Courante over te schrijven waere te veel, des sal V.L. ghelieven dit weynighe ten goede te nemen, houdende dit alles voor waerheyt, want ick dit niet en schrijve, dan uyt den mont der ghener die daer present zijn gheweest.
Met Gratie ende Privilegie.
Goede leser besiet, oft leest met verstant in het boecxken V ghenaempt Den Eyghen Sin van d’Oorloghen in Europa tot beveſtinghe des Overheyts van Coningen en Princen. Door Heere-man Chunradus, Baender-heer tot Fridenborgh, Ridder van het Gulde Vlies, Paltz-Grave, &c. daer suldy wonderlicke saecken wt connen verstaen, het welcke v een groot licht sal geuen om selfs oock den tegenwoordighen handel in Hollandt ende der andere Ghe-unieerde Provintien te verstaen, ende haer ooghmerck te bemercken.
