7
coopen: ende dat het Notabelste is, also de Borgers gheen Ghelt op haer en hadden, is Duyn Claessen aende Soldaten daer Borgh voor ghebleuen, midts dat hy wederom Notabele Burghers heeft ghedwonghen aen hem Borgh te blijuen, dreygende de selue anders by den kop te vatten, ende in een gadt te smijten: De Vrouwen en andere nv meest haer goedt, uytghenomen Gheldt, Buydels, Ringen etc. weder-ghekreghen hebbende op sulcken Rantsoen als ghezeyt is, sijn by Duyn ghebleuen, uyt vreese van noch eens gheplundert te worden indiense van Duyn hadden ghescheyden. De Soldaten hebben op den Hoeck haer seluen wel vol zitten drincken, ende zijn eerst snachts ten twaelf uren inde Stadt ghecomen. Een goedt Burger rechts buyten de poorte met zijn Dochter wandelende ende gheen ghedachten hebbende inde verghaderinghe te gaen, is vande Soldaten gheplundert van mantel, hoedt, Borse, Geldt, ende zijn Dochter van al haer Silver ende Juweelen: so hebbense oock noch met verscheyden andere ghehandelt. De andere Soldaten die byden Onder-Schoudt hadden gheweest, zijn op den avont inde schemeringhe inde Stadt ghecomen, met eenighe gheplunderde Borgers: De Borgherije eenighe Soldaten siende met den Buydt incomen, hebben dat niet wel connen verdraghen, so datter eenighe teghen malcanderen raeckende sommighe ter weder zijden ghequetst zijn: Ende t’was gheschapen dat de Stadt in een Bloed-badt hadde ghestaen. De Soldaten hebben oock den gheheelen nacht inde Wapenen ghebleuen wt vreese van ouervallen te worden: Doch is alles noch verdraghen ende ter neder gheleyt.
Des anderen daeghs isser een Soldaet in des Predicants Lansberghen huys ghevallen, ende heeft hem met zijn Huysvrouwe gheslaghen, ende groote insolentie bedreuen. In Somma de Soldaten makent alhier oftse korts daer wilden uytgheboent worden. De Arminianen worden alle daghe teghen de Gommaristen meer verstaelt ende
