4
het Gulde Vlies. Naer de Misse den Eerweerdichsten ende Doorluchtichsten Bisschop Henricus heeft een cleyn arange ghedaen, hem seer willecom heetende: daer naer hebbende t’samen geten int Casteel sijn ghegaen tot den naest gheleghen Leger niet verre vande Stadt Gundelsinga, al waer de Soldaten in Orden ghestelt heur met een Heerlijcke decharge der selver plaetse onthaelt hebben: Sanderdaechs zijn zy ghegaen naer den Legher vande Loreynen, al waer zy met een treffelijcke maeltijt vereert zijn geweest vanden Doorluchtichste Markise der plaetse.
Op onse Lieve Vrouwe Visitatie zijn by dander Princen ghekomen den Hertoge van Bouino, ende Vrsino Italianen, t’sedert den tweeden dach van hare compste hebben zy daeghelijckx geconsulteert vanden peys met den vyant, ende van hare Conditien. Dese is op den Feestdach vanden Heyligen Vdalricus Patroon van Ausburch ten vollen ghesloten: ende Sondaechs daer nae is met consent van Partijen, ende Brieven tot Vlm bevesticht. Desen peys is seer onverwacht gheweest, maer wy verhopen dat sal wesen tot voordeel vande Catholijcke Lige, onder andere hebben desen quaelijck af ghenomen de Ruyters van Conte de Lip: vande welcke veel sonder hooft ende Vendel zijn afgheweken. De Rouillaensche Soldaten hebben oock ghemutineert, ende
