5
als te peerde, het scheen van verre dat eenen silueren Berch was, om te sien ouer de dertich duysent mannen inde Wapenen, met allen haren byloop vant’ Legher. De Trompetten speelden alderhande Liedekens, de Trommelen sloeghen datmen qualijck hoorden.
Sijne Excellentie den Marquis Spinola rede ouer al, de Cornellen, Cappiteynen, ende alles deden hem groote Reverentie, soo dede den Marquis oock van ghelijcken met den Hoedt in de hant vermanende, ende segghende, Messieurs ick sal v als een kloeck Cappiteyn voor gaen, ende t’ghene hier nv is ofte siet, is voort’ Catholijc Apostolijck Roomsche Gheloove, ende t’Huys van Oosten-rijck, alwaer int Generael gheroepen wert, Vive, Vive, la Maison d’Austriche, ende daer werdt een Salu-ade ghedaen van dry mael los te schieten int gheheele Legher, dat scheen dat het Aertrijck beefde, ende de Loecht vol viers was.
Men verwachten noch vijf duysent mannen, die souden volghen.
By desen Tocht waren menichte van Peerden, daer de knechts op saten die mede trocken, elcken Cornel, Cappiteyn, Luytenants, Bevelhebbers, Ruyters, oft sy en hadden knechts oft Mut-ziatsen te Peerde, jae de sommighe twee oft dry knechts.
