6
Sijn Excellentie den Marquis Spinola is met den Legher voorts ghecrocken, alles met een goede Ordre, sijn Exc. Marquis Spinola was wel ghemoet vrolijck van ghesichte, hy hadde de Fraeyste soldaten met hem diemen met ooghen moecht sien alles wt ghelesen volck, wel ghemonteert.
Die van Hollant verstaen hebbende dat zijn Excellentie den Marquis Spinola opgetrocken was met sulcken menichte van Crijsch-volck, ende daer by noch hebbende een menichte van Tonnen schats alles in baren Ghemunten Ghelde, soo Goudt als Siluere Munte, sonder de Provisie die hy te voren noch hadde, ende t’ghene noch daghelijckx ghetracteert wort tot den Oorloghe, d’welc die Hollanders niet en connen verstaen, ende die van Duytslandt doet beuen, Jae men vint in geen Historien beschreuen dat de Romeynen oyt soo veel Ghelts in haere Leghers ghehadt hebben.
Die vande Ghevnieerde Provintien, sulcx vernemende, jae sommighe met hun eyghen ooghen ghesien hebben de menichte van t’Gheldt, sijn verwondert gheweest, niet wetende waer den Marquis Spinola met sijnen Legher trecken soude, soo hebben die Ghe-vnieerde Provintien allen hun macht by een verghadert, ende ghesonden den Rhijn opwaerts naer Emmerick acht hondert schepen, met
