6
dach ende Vastendach in allen Kercken afghelesen, ende datse souden met den Bethlehem Gabor in de Hunghersche Croone in verbont zijn.
Den Esterhasij is by Comorra met thien duysent mannen van de Catholijcken tot secours van de Keyserlijcke Majesteyt, ende t’volck dat ouer een maent oft 5. weken wt Weenen ghecomen was met provisie ende victalie is binnen Comorra gheluckelijck ghearriveert.
Den Bethlehem Gabor rust sich sterck toe met de Hungheren, ende heeft aen den nieuwen Ghepretendeerden Coninck van Bohemen gheschreuen dat hy met vijftich duysent mannen te velde wilt comen, wat datter af comen sal wilt ons den tijt leeren.
Den nieuwen Beemschen Coninck wilt ooc seluer te velde comen, heeft allen de Leenheeren, ende Gheboerte op ontboden, heeft den 24. doen publiceren binnen Praghe met gedruckte Placcaten doen affigeren, als dat allen de ghene die onder de Croone van Bohemen sijn hun binnen 14. daghen souden ghereet maken tot den Oorloge, op de verbeurte van lijf ende goet.
Den Hertoch van Saxen heeft in Bohemen wederom een plaetse in genomen, ende den Hertoch van Beyeren heeft hem ghevoecht met den Legher van den Graeff van Dampierre.
