3
vighe vermeynden te beletten. Alsoo dat wy nu den vijant op den voet volghen: want de Resolutie is ghenomen teghens hen te slaen, soo verre zy anders standt houden, Het Wiertzborchste ende ons achter ghelaten volck, wesende 12. duysent sterck, is ordre ghegheven hun te vueghen by Don Baltasar, om den Pilsner ende Pragaditzer Kreys te ouer vallen, wat daer van comen sal leert den tijt.
Tijdinghe vt Weenen vanden 10. Sept. 1620.
Den oversten van Reiffenbach tot Commorra, adviseert, dat de Hongheren inde Marckt eene vergaderinghe ghehouden hebben, de welcke hy met zijne Soldaten ouer vallen heeft, de Merct in brant gesteken, ende veele doot geslagen.
Dese Fortresse als oock de Stadt ende Fortresse Raab, zijn beyde voor Jaer ende dach geprovideert, van Viuers ende Ammonitie. Den Betlehem Gabor wordt daghelijcx tot Presbourch verwacht, soude ontrent de 30. duysent mannen sterck wesen. Derwaerder worden ghesonden, den Grave Colaldo, Heer Jeorg Teuffel, met een Honghersche Heere, ende eenen Bisschop, als Keyserlijcke Commissarien verordineert, ende men hout voorseker dat Betlehem teghen de Keyserlijcke Majesteyt niet en sal voornemen, voor Sint Michiels dach, als wanneer den Trefues is eyndende.
