7
den Hertoch van Saxen is sterck ouer de 18. duysent mannen. Wt Preslau wordt ons gheseyt, dat hun op de Frontieren 3000. Cosacken ghepresenteert ende vertoont hebben, ende soomen wt Polen schrijft hebben die van Slesien eerst daeghs eenen grooten inval te verwachten, ende de Pollacken commen met grooter menichte om dienst te hebben, verhopende eenen grooten Rooff ende Buet te becomen.
Gh[i]steren is Hoptman Sachsen Louenberch (den welcken in Moravien ghedient heeft wederom wt Bohemen comen, beklaeght hem grootelijck vande quade betalinghe, ende onraeyt elck een by de Bohemen te dienen.
Int sluyten van desen compt tijdinghe dat Bautzen is ouer ghegheven by appoinctement, ondertusschen wordt noch veel gheschuts ende andere Krijchsrustinghe, naer het Keurvorstelijcke leger gesonden, Wy hebben oock tijdinghe dat des Keysers Volck Praghaditz in Bohemen souden in genomen hebben.
Wt Bisschops-weert vanden 4. Septembris.
Ghisteren is dat Goltsherinisch Regiment met 5. Compagnien peerden, ouer t’water teghen Gerlitzer poort ouer gheset, ende de passagie die zy op Gerlitz hadden, af ghenomen, ende gisteren is de Stadt voor de 3. reyse op ghevoordert, om hun in haere Keurvorstelijcke ghenaden ouer te geuen, ende
