11.
3. Soo wie vande Raedtſ-Heeren, oft de dinghen ſijn officie toeſtaende niet wel en bedient, oft met ſwaerder laſten becommert wert, ſullen de Generale Staten daer in voorſien.
4. In ghewichtighe ſaecken ende van grooten weerde, daer t’ghemeyne wel-varen ſoude aenhanghen, en ſal den Gouverneur iet moghen ſtellen ſonder toeſtaen vande Generale Staten.
5. In ghewichtighe ſaecken de Generaliteyt aengaende, als ſijn impoſten, gelt-ſchattinghen, handelinge van Oorloghe, ofte peys met Wt-heemſche Princen, belaſtinghe der Onderſaten, ende andere diergelijcke ſullen de Generale Staten ghehouden ſijn, eerſe iet daer in doen t’ſelve de Regierders ende gemeynten voor te houden, want het billich ſchijnt, t’ghene een yder aengaet, van een yder oock toegheſtemt ende goet ghevonden worde. Ende dit ſchijnen te vereyſchen de Privilegien des Vaderlandts, ende rechte Politien.
6. Dat den Gouverneur gene VVetten, Ordinantien, oft Begeerten van grooter importancie, Nieuwicheden, ende onghewoon ghebruyck inſtelle ſonder advijs der Generale Staten, ende der gemeenen raedt daer toe wettelijck vergadert.
7. Int cort, in alle dingen de welcke een natuerlijck Prins des Landts ende Hertoch van Brabandt, aen den Raedt van Brabant om advijs, moet te kennen geven, sal den Gouverneur in alles den Raedt der Generale Staten naervolghen. Maer de Ghedeputeerde moeten de Overſten vande welcke zy gheſonden ſijn, t’ſelve gheuoegelijck verclaren.
8. Alle Brieven eenichſins aengaende den ſtaet der Landen die hy ontfanghen ſal, moet de ſelve den Raedt der Staten ouerleveren, op dat zy vande ſelve beraden ende ſtellen moghen.
