8.
by toelatinghe, tot dat zy van selfs, oft door oorlogen verwonnen zijnde, haer Coninckrijcken in Lantschappen verandert zijn gheweest.
De selue tijden, een seluen afkeer van alle Koninghen door een seecker ongelijck beschick is hedendaechs in vele herten inghewortelt, te weten met macht der Koninghen de Koninghen aff te stellen, ende nieuwe gemeynten in te brenghen, t’welck by see verre het voortgaet, oock inde treffelijcste ende voornaemste Rijcken den naem der Koninghen sal versteruen, want hier toe strecken alle gedachten ende voornemen, om andere formen van Republijcken in te stellen, alleen door een ingheboren onghestadicheydt der sinnen, ende verwaentheyt zijn selfs, meynende den Papegay gheschoten te hebben, als zy by ghebeurte maer meughen Meester en knecht zijn, t’welck in Coninckrijcken haer gheweygert soude werden.
Dese hope om metter tijt alle Coninghen wt Europa te bannen wt vele marck teeckenen is groot, ende ten zy de Coningen haer vooz wachten niet sonder fondement. Want aldus reeckenen zy vernuftelijck, ende soomen seght politelijck. Inde Adriaensche Zee d’Edele Venetiaenen heerschen verre ende naer by, haere rijckdommen ende vryheyt hebbense met t’wist vande aenpalende Princen beuesticht, eertijts Bont-ghenoten vanden Turck, vreeselijck aen Italien, ende versmaders der Keyseren van Constantinopelen, deur haer exempel tot t’selue voornemen zijn verweckt Milanen, Genua, Piſa, Florentia, Luca, ende hebben onuerwinnelijck ghestaen teghens haer Princen, ende Coninghen, tot datse teghens een opstaende, met inlandtschen krijch verwonnen zijn gheweest.
De Switsers hebben insghelijckx haer ontrocken van de Ouerheyt der Prince, niet alleen dese rebel zijnde, maer ghesocht alle den Edeldom wt te roeyen, ghelijck het geschiet is, hoe wel niet sonder groote bloedt-stortinghe om sulcken vrijheyt te verkrijghen. Soo datse nu met wetten onder een verbonden zijnde, onder de berghen haer sterck houden, veeselijck oock aende Koninghen, iae Scheytsmannen der oorloghen tusschen Vranckrijck ende Duytslandt. Hoe krachtich dat deser exempelen zijn gheweest is een yder kennelijck, maer niet naer de ghewichticheyt der
