4
hunne ghesellen gebleuen, oft zijn verstroyt, oft hebben hun erghens ghesalveert, het welcke sy niet en weten, midts van hun gheen tijdinghe en hadden, de principaelste vande Polacken die nv comen zijn, hadden des anderen daechs naer hun Arrivemendt Audientie by den Keyser, ende versekerden den Keyser datter noch 16. duysent op de Frontieren waeren, om zijne Majesteyt te comen dienen, twee daghen daer naer zijnder noch 300. andere ghecomen, ende daer naer noch 200. soo datter 700. ghearriveert zijn ende daer souder vande duysent noch 300. ghebreken die sy gheloouen datter moeten ghebleuen zijn, mits sijder geene tijdinge van en hebben, daer sijnder oock eenighe vande ghecomene gheweldich ghequetst.
Van Breslauw wt der Slesien.
Over weynich daeghen zijnder ouer de duysendt Cosagghen aen diveersche plaetsen den Hertoch van Brieg int Lant ghevallen, hebben daer vier Dorpen verbrant ende gheplondert, oock een kerck daer veel volcx in ghevlucht was ouervallen, de lieden doodt gheslaghen, ende andere Edel Jonckers huysen berooft ende in brandt gefteken, sy hebben ouer de dry Tonnen Goudts weert Buedt ghekreghen, de Slesische vervolchden hun, maer by Oppelen laghen noch xij. duysent Cosaggen, die de passagie op Moravien wilden nemen, om by den Keyser te comen.
