11
Den Marquis de Mirabel, Ambassadeur van Spagnien, ende den Grave de Verrua Ambassadeur van Savoyen, zijn wt het Hoff wederomme alhier ghearriveert.
Tijdinghe wt Parijs vanden 25. Januarij.
Monsieur de la Chené, Gouverneur vande plaetse van Royan, is’thoofft aff gheslaghen tot Bordeaux, vande Justitie, ende hy zeyde opt Schavodt soomen hem zoude Onthalsen, dat indien den Constabel noch int Leven hadde gheweest, dat hy niet en soude hebben moeten sterven, midts dien hy door zijnen last ende Bevel de zelve plaetse hadde den Revolteren, ende Rebelleren teghen den Coninck. Monsieur de la Forze was met vele volckx wt Montalbaen ghetrocken, omme sekere xxij. Muylen gheladen met Coopmanschappen die naer Tolouse ghinghen, aen te tasten, maer hy is te spade ghecomen.
Tot Montalbaen sterven alle weken, wel hondert vijftich Persoonen vande Peste, ende het broot cost daer vijftich stuyvers t’pont.
Met Brieven van Lyons vanden xvi deser wort gheadvizeert dat den Maerschalck d’Esdiguieres, met ses duyzent mannen te voet, te Velde was, omme de Passagie vande Rodaen, open ende vry te houden, ende dat hy eenen getrouwen Diernaer des Coninckx is.
Z ij
