7
ende den 10. Altzeym, d’welck hier een groote vreese maeckt, ten is maer vier mijlen van hier, ende ses mijlen van Heydelberch, wy hebben hier binnen Franckendael Garnisoen ghecreghen van de Protestanten, men verwacht noch x. duysent Boeren, in de wapenen, hier is alles meest ghevlucht wt de stadt, ende de beste goederen wech ghedaen, men is hier in soberen staet, maer men vertroost ons hier als datter secours wt de Ghevnieerde Provintien soude comen, van eenighe duysent Engelschen, ende twee duysent peerden, die souden comen oft gheconduiseert worden door Graef Hendrick van Nassou, maer ten sal niet wel af loopen, de macht van den Marquis Spinola is te groot, hy heeft veel volckx by hem, ende gelt daer by.
Hier hebben wy tijdinghe voorseker, als dat den Marquis heeft by sich 24. duysent wtghelesen voetknechten, ende 48. Compagnien Ruyters, de welcke waren 4. duysent, ende 7. hondert cloeck volck.
Men verstont datter eenighe Ruyters yet hadden willen besichtighen aen den Protestanten Legher, waer van daer ettelijcke af souden gevangen wesen. Voorts hoe dat gaet oft niet, wy zijn hier in eenen bedroefden staet, ende ghequelt met Soldaten, d welck wy onghewent zijn, maer moeten patientie hebben, den meesten Rijckdom is al van hier ghevlucht.
FINIS.
