VVt Roomen den 1. Mey. 1621.
SOndach heeft de Paus den Prince Johan Georg Aldobrandinum ende Joffrouw Hypolita Ludovisia inde Capel Sisti, ten overstaen van 16. Cardinalen, ghetrout, die Bruydt is in Edelgesteent op 130. duysent Croonen waert, ghesiert geweest, de welcke den Hertogh van Parma een Cruys mitsgaders een bloem van Diamanten op 10. duysent Croonen waerdich heeft ghepresenteert, oock die Cardinael Farnesius een snoer van Peerlen op 8000. Croonen waert, insghelijcks heeft die Bruydegom sich in een seer schoone Leverey dewelcke 13. duysent Croonen bedraecht, ghepresenteert.
Die aenneminge vande 5000. man voor die Keyser voor des Paus rekeninghe, gaet sterck voort, soo wert oock veel volcks tot versterckinghe vande Pauselijcke Galleyen aenghenomen.
Die Veltiners hebben 2. Doctooren alhier gesonden, om hulpe te versoecken teghens die Groubunders dewelcke sich taemlijck sterck te velde bevinden.
Tot Napels is de Cardinael Doria aengecomen, aldaer worden acht Galleyen toegherust, om met die Siciliaensche ende Maltesische Galleyen in Levanten te streupen.
VVt Venetien den 6. dito.
Van Mijlanen heeftmen, dat niet alleene des Capiteyns Gambuzela Soldaten in Graubunten terug ghedreven, maer oock van een achterhoede die in alles 14. Vaendels gheweest is, van Mesolzina tot op Roveret 3. mijlen van Belinzona met verlies van inde 200. man inde vlucht ghedreven ende veele ghequetst zijn.
Brieven van Constantinopel melden dat alle t’krijgsvolck van Adrianopel nae Belgrado op den monsterplaets op 300. duysent man voort ghesonden werden, van alsoo die Persiaensche Coninck ghestorven is, stonden die Turcken noch in twijfel of sy teghens die Pollacken, ofte den nieuwen Persianischen Coninck trecken souden, so hebben oock die Cossacquen wederom een groote Stadt gheplondert ende rijcke buyt bekomen.
Wt VVeenen den 6. Mey.
Van den Honghersche toestandt is ander niet te schrijven, als dat dese Stadt Overste, de Heere van Stadion nevens den Heere Palatino, Aponi Paul ende andere over die Schipbrugh aende Marck totte Grave van Bucquoy ghereyst is, de welcke metten uytschot van’t beste Crijchs-volck ende ettelijcke stucken alrede voor Presburgh gheruckt waren ende daer vooren geschantst, waer over sich de selve Stadt den 2. deses opt ghegeven Perdoen, in Keyserlijcke Majesteyts devotie soude over ghegeven hebben, die twee Duytsche Compaignien die daer in lagen hebben sich vande Burgherije ofgescheyden ende sich opt Casteel by de Hongaren begeven, dewelcke tsamen gheswooren hebben, sich tot opten laesten man te weren, ende over sulcks een bloet vane uytghesteecken, zijn tsamen 800. sterck, schieten dach ende nacht sonder op houden inde Stadt, sulcks dat nevens des Generaels Bucquoys Wacht meester alrede inde 800. man daer voor gheschooten zijn, insghelijcks oock 2. groote Proviandt Schepen, dewelcke van hier daer henen ghesonden, inde grondt gheschooten zijn.
Het Slot wort uytten Wijnberghen met vele stucken beschooten, daer van in den aenvanck het grootste aen stucken gheborsten is, ende onder die omstanders groote schade ghedaen heeft, waer over voorgisteren wederom 4. dobbelde Cartouwen daer henen gesonden zijn, ghelijck oock allerley munitie ende een groote somme ghelts derwaerts ghesonden is, ende heeftmen gisteren den gheheelen dach dapper horen schieten, soo datmen meynt dat die vant Casteel tvier inde Stadt geschoten hebben, Betlehem soude hun belooft hebben binnen acht daghen t’ontsetten, bevint sich tot Nieuheusel, alwaer 2. Turcksche Chiaux aenghecomen zijn ende hem die Turcksche hulpe voorseker toegheseyt hebben, ghelijck dan tot Adrianopel over die 100. duysent ghereet laghen, soo heeft oock Betlehem met den Setschi gheslagen, ende den selven inde 1500. men te nedergheleyt, so dat hy sich inde vestnis Muran begheven, ende van Keyserl. Majesteyt hulpe versocht heeft, zijnde aldaer van Betlehem hert belegert.
Die Vorst van Neuburgh, is van hier per posta wederom nae huys verreyst, ende sal morghen die Fransche Ambassadeur oock wederom nae Vranckrijck verreysen.
VVt Praghe den 4. Mey.
Voorleden Saterdach is alle dat Beyersche volck te Peerde ende te voete, twelck tot dien tijt toe alhier ende om Praghe gheleghen heeft, opgebroocken ende wech ghetrocken, in diens plaets het Walsteynsche Regiment alhier wederom aengecomen is, waer henen dit Volck marcheert can men eygentlick niet weten, etlijcke segghen inde Pals, ettelijcke in Beyeren, andere na Elleboghen ende Egher, al waer Mansvelt sich seer sterck bevint.
Van Franckensteyn in Slesien wert ghemelt, dat die Vorsten ende Standen alreede inde vier Weecken by malcanderen zijn gheweest, ende volcomelick gheresolveert zijn, niet te scheyden voor datmen goeden middel ghevonden heeft om die Soldaten ende den Generael te betalen, ende af te dancken, dat alreede int werck ghestelt, ende een aenvanck met vier Compaignien ghemaeckt is.
Die Papisten alhier ghebruycken groot ghewelt ende moetwillicheyt teghens die Evangelischen, hebben alreede inde voornaemste Boheemsche Kercken, die Huyssittische Predicanten ofgheschaft, Zijn oock onse Duytsche Predicanten ten tweeden male gevordert, ende bevolen hare Vrouwen van sich te schaffen, ende vanden Erts-Bisschop Wijen te laten, twelck zy niet doen willen, maer drie Ghesanten daer op totten Chur-Vorst van Saxen ghesonden, diens resolutie men met verlanghen verwacht.
Voorleden Donderdach is de oude Graeff van Thurns Huysvrouwe van Weenen alhier aenghecomen, soude op haer ootmoedich versoeck hare goederen in Styrmarck wederom ghecregen, ende voor haer vrij ghemaeckt hebben. Die jonghe Grave van Thurn (soo men seyt) soude sich by den Marck-Grave van Jaghers-Dorp ofte inde Marck begheven hebben, staet daer op dat sijne goederen ingetrocken ende sijne Slot Wallich twelck seer sterck is, beset sal worden.
VVt Mayenvelt den 2. Mey.
Voor 4 daghen zijn die onse met gheheler macht opghebroocken, om in Gallantzer Daal die Spaenschen uyt te rooden, ende dewijle de Inwoonders der selver plaets meer Spaensch als Patriotsch zijn, is gheordonneert, in ghevalle sy haer bemaetighen, dat men hen de wapene afnemen ende den pas met Garnisoen besetten sal, als nu aenghecomen zijn, hebben sy tamelijcke teghenstant ghevonden, dan zijn vande
