begeert hebben, verluyden laten, hy konde geen volck missen, overmits hy daghelijcks eene belegheringhe verwachte.
Dat volck twelck by de Duytsche Vorsten ofghedanckt wort, wert wederom ten deele van Spinola, de Venetianen, ende den Overste Overtrout aenghenomen.
Eenighe Hollantsche Coopvaerdije-Schepen legghende tot Lisbona seyl-reet om te vertrecken, (wierden door aenbrenghen van seker scheepken, dat daer tijdinghe brocht dat in Zeelant eenighe Schepen waren inghebrocht) belast niet te vertrecken, doch sommighe lichten haer Anckers ende ginghen even wel deur, niet teghenstaende die van ’t Casteel dapper schoten, hoe’t met de andere gegaen is, can men noch niet weten.
Die van Leypsich vermelden hoe datter een Vorstandach tot Torgau was aenghestelt, waer op de Hertogh van Sacxsen, die Hertog van Brunswijck ende Lunenburgh ende verscheyden andere compareren souden.
Oock verstontmen van Hamburgh dat tot Lunenburgh een dagh van de Nederkreyts aengestelt was in teghenwoordicheydt van den Ambassadeur des Keysers, maer dat zy naer langhe deliberatie sonder eenighe vrucht ghescheyden waren, doch soude de Conincklijcke Majesteyt van Denemarcken eenen expressen aen den Keyser ghesonden hebben.
Het Crijchsvolck vanden Coninc van Denemercken leyt vele int Graefschap Schouwenburgh, int Landt te Bruynswijck ende daer ontrent: ende waren eenighe schepen met amonitie ende geweer de Elve opghevaren.
Brieven uyt Franckenstein melden, hoe dat den Marckgraef van Jagersdorp noch veel volcx by den anderen hadde, ende dat hy wederom op een nieu wel ses duysent Mannen onder de name vande Conincklijcke Majesteyt van Denemarcken hadde aenghenomen.
Die van Rochelle brenghen mede, datter alreede eenighe duysent mannen ontrent deselve Stadt aenghecomen waren.
Den Marquis Spinola met eenighe by-hebbende Adel ende suite heeft de voorgaende weecke eenighe Schanssen ende plaetsen wesen besichtighen buyten Antwerpen aende Vlaemsche zijde. Men vermoet dat hy teghenwoordich tot Brussel is, ende eerstdaechs vertrecken sal.
Alsoo den Vyandt sterck vergadert ende te Velde comt, werter inde vereenichde Provintien veel krijgsvolck aenghenomen, ende in alle Steden daghelijcks den Trommel gheroert.
De Doorluchtighe Princesse van Orangien is op maendagh den 24 May heerlijck tot Delff begraven, daer van men de particulariteyten metten naesten verwacht.
Daer comt tijdinghe dat de Hollantsche schepen die tot Lisbon waren gehouden, mede zijn ontcomen off los ghelaten, die dagelijcx verwacht werden, ende eenighe al voor’t Lant zijn.
Ghedruckt by Broer Jansz. out Corantier int Legher van sijn Princelijcke
Excellentie, woonende op de nieu-zijds-achter-Borchwal inde Silvere Can, by de Brouwerije vande Hoy-Bergh, den 26. Mey, 1621.
