Sinne- en minnebeelden/Hoe datmen ’t deckt, het wert verweckt

HOE DATMEN ’T DECKT, HET WERT VERWECKT.
Wanneer des seylsteens kracht is in het stael getogen,
Soo wort’et metten steen aen alle kant bewogen;
En schoon al tusschen bey een schutsel is geset,
Noch baert de steen haer kracht en treckt het yser met.
Wat baet’et, ydel mensch, een quaet gemoet te decken?
God kan u schuldigh hert oock uyt het duyster trecken:
Wie voelt niet metter daet, dat hem de ziele drilt,
Oock daer hy is alleen, en daer hy niet en wilt?